തിരുവനന്തപുരം: കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്റെ പരാമര്‍ശങ്ങള്‍ വേദനിപ്പിച്ചുവെന്ന് ആരോഗ്യമന്ത്രി കെ.കെ.ശൈലജ. സഹായിച്ചില്ലെങ്കിലും പരിഹസിക്കരുതെന്നും കെ.കെ ശൈലജ പറഞ്ഞു. മാറി നിന്ന് കമന്റ് പറയാന്‍ എളുപ്പമാണ്. നിപ സമയത്ത് താന്‍ ഗസ്റ്റ് ആര്‍ട്ടിസ്റ്റായിരുന്നോ എന്ന് ജനങ്ങള്‍ വിലയിരുത്തിയിട്ടുണ്ടെന്നും കെ.കെ. ശൈലജ പറഞ്ഞു.
‘ നമ്മളെല്ലാവരും മനുഷ്യരല്ലേ, കാരണം നമ്മളെല്ലാവരും ആത്മാര്‍ത്ഥമായി പാടുപെട്ട് നമുക്ക് പരിചയമില്ലാത്ത ഒരു ശത്രുവിനോട് പോരാട്ടം നടത്തി ഓരോ മനുഷ്യനെയും രക്ഷിക്കാന്‍ ശ്രമിക്കുന്നതിനിടെ അതിനെ സഹായിച്ചില്ലെങ്കില്‍ പോകട്ടെ, അതിനെ പരിഹസിക്കുകയും, ചെയ്യുന്നതെല്ലാം മോശമാണെന്ന് വരുത്തി തീര്‍ക്കാന്‍ ശ്രമിക്കുകയും ചെയ്യുമ്ബോള്‍ മനുഷ്യരായാല്‍ സ്വാഭാവികമായി നമുക്ക് വിഷമം ഉണ്ടാകില്ലേ, ആ വിഷമം എനിക്കും ഉണ്ടായിട്ടുണ്ട്,’ കെ.കെ. ശൈലജ പറഞ്ഞു.
‘ മാറി നിന്നിട്ട് ഇത്തരം കമന്റുകള്‍ പറയാന്‍ വളരെ എളുപ്പമാണ്. നമുക്ക് നമ്മുടെ പ്രവര്‍ത്തനവുമായി മുന്നോട്ട് പോവാം,’ കെ.കെ. ശൈലജ പറഞ്ഞു. മുല്ലപ്പള്ളിയോട് ക്ഷമിക്കുമോ അതോ എന്നും ആ വാക്കുകള്‍ ഓര്‍മിച്ചു വെക്കുമോ എന്ന ചോദ്യത്തിന് മുല്ലപ്പള്ളിയോട് ക്ഷമിക്കാന്‍ ഞാന്‍ ആരുമല്ലെന്നും ആരോഗ്യമന്ത്രി മറുപടി നല്‍കി.
‘ ഞാനാര് മുല്ലപ്പള്ളിയോട് ക്ഷമിക്കാന്‍, അദ്ദേഹം എന്നേക്കാളും മുമ്ബേ രാഷ്ട്രീയ പ്രവര്‍ത്തനം ആരംഭിച്ചിട്ടുള്ള ഒരു നേതാവാണെന്നാണ് ഞാന്‍ കരുതുന്നത്. ഞാനത് കേട്ടിട്ടില്ല. ഞാനത് കണ്ടിട്ടില്ല, അങ്ങനെ ചിന്തിക്കാനാണ് ഞാന്‍ ആഗ്രഹിക്കുന്നത്. ഞാന്‍ എന്റെ ജോലിയും ചെയ്ത മുന്നോട്ട് പോവുന്നു,’ ആരോഗ്യമന്ത്രി പറഞ്ഞു.
കേരളത്തിന്റെ കോവിഡ് പ്രതിരോധതന്ത്രം മികച്ചതാണെന്നും പ്രതിപക്ഷനേതാവ് രമേശ് ചെന്നിത്തലയ്ക്ക് മറുപടിയായി അവര്‍ പറഞ്ഞു. പരിശോധന കുറവല്ല. സമൂഹവ്യാപനമുണ്ടായാല്‍ അപ്പോള്‍ത്തന്നെ തുറന്നു പറയുമെന്നും കേരളത്തില്‍ ഇത്തരം കാര്യങ്ങള്‍ ഒളിച്ചു വയ്ക്കാനാവില്ലെന്നും ആരോഗ്യമന്ത്രി പറഞ്ഞു.
Discussion about this post