കോവിഡ് 19 : കുവൈറ്റില്‍ ഇന്ത്യക്കാരനുള്‍പ്പെടെ രണ്ടു പേര്‍ മരിച്ചു. 80 പേര്‍ക്ക് കൂടി രോഗ ബാധ

കുവൈറ്റ് സിറ്റി : ഇന്ത്യക്കാരനുള്‍പ്പെടെ രണ്ടു പേര്‍ കൂടി തിങ്കളാഴ്ച്ച കുവൈറ്റില്‍ കോവിഡ്-19 ബാധിച്ച്‌ മരിച്ചു. ബംഗ്ലാദേശി പൗരനാണ് മരിച്ച രണ്ടാമത്തെയാള്‍. മരിച്ചവരുടെ എണ്ണം ഒന്‍പതായി. . 80 പേര്‍ക്ക് കൂടി വൈറസ് ബാധ സ്ഥിരീകരിച്ചു. ഇതോടെ രാജ്യത്ത് രോഗം ബാധിച്ചവരുടെ എണ്ണം 1995 ലെത്തി എന്ന് ആരോഗ്യ മന്ത്രാലയം അറിയിച്ചു. പുതിയ രോഗബാധിതരില്‍ 47 പേര്‍ ഇന്ത്യക്കാരാണ്. . നിലവില്‍ രോഗം ബാധിച്ച ഇന്ത്യക്കാരുടെ എണ്ണം 1132 ആയി. 367 പേര്‍ രോഗമുക്തി നേടിയെന്നും, തീവ്രപരിചരണ വിഭാഗത്തില്‍ ഉള്ള 39 പേരില്‍ 26 പേര്‍ ഗുരുതരാവസ്ഥയിലാണന്നും ആരോഗ്യ മന്ത്രാലയം വ്യക്തമാക്കി.

സൗദിയില്‍ കോവിഡ് ബാധിതരുടെ എണ്ണം പതിനായിരം പിന്നിട്ടു. തിങ്കളാഴ്ച് 1122 പേര്‍ക്ക് കൂടി പുതിയതായി രോഗം സ്ഥിരീകരിച്ചതോടെ, രാജ്യത്തെ വൈറസ് ബാധിതരുടെ എണ്ണം 10484 ആയി എന്ന് അധികൃതര്‍ അറിയിച്ചു. ആകെ രോഗബാധിതരില്‍ 27 ശതമാനം മാത്രമാണ് സൗദി പൗരന്മാര്‍. ബാക്കി 73 ശതമാനവും വിദേശികളാണ്. ആറു പേരാണ് മരണപ്പെട്ടത്. ഇവര്‍ 23നും 70നും ഇടയില്‍ പ്രായമുള്ള. വിദേശികളാണ്, അഞ്ചുപേര്‍ മക്കയിലും ഒരാള്‍ ജിദ്ദയിലുമാണ് മരിച്ചത്. 92പേര്‍ക്ക് പുതുതായി സുഖം പ്രാപിച്ചു. ഇതോടെ രോഗമുക്തരുടെ എണ്ണം 1490 ആയി. 8891 പേരാണ് ചികിത്സയിലുള്ളത്. 88 പേരുടെ നില ഗുരുതരമാണ് ഇവരെ തീവ്രപരിചരണ വിഭാഗത്തില്‍ പ്രവേശിപ്പിച്ചു.

സൗദിയില്‍ കോവിഡ്-19 ബാധിച്ച്‌ മരിച്ച ഇന്ത്യക്കാരുടെ എണ്ണം 10ആയി. കേരളം, തെലങ്കാന എന്നീ സംസ്ഥാനങ്ങളില്‍ നിന്നു രണ്ടും മഹാരാഷ്ട്ര, യുപി എന്നിവിടങ്ങളില്‍ നിന്നു മൂന്നു പേര്‍ വീതവും ഇതുവരെ മരിച്ചതായി കോണ്‍സുലേറ്റ്, എംബസി വൃത്തങ്ങള്‍ അറിയിച്ചു.ഏപ്രില്‍ 4 ന് മദീനയിലെ സൗദി ജര്‍മന്‍ ആശുപത്രിയില്‍ മരിച്ച ഷെബ്‌നാസ് പാലക്കണ്ടിയില്‍ (30), റിയാദില്‍ മരിച്ച സഫ്‌വാന്‍ നടമ്മല്‍ എന്നിവരാണ് മരണപ്പെട്ട മലയാളികള്‍.

യുഎഇയില്‍ 484 പേര്‍ക്ക് കൂടി കോവിഡ്-19 . ഇതോടെ രാജ്യത്തെ രോഗികളുടെ എണ്ണം 7,265ആയി. രണ്ടു പേര്‍ കൂടി മരിച്ചതോടെ മരണ സംഖ്യ 43 ആയെന്നു ആരോഗ്യ-രോഗപ്രതിരോധ മന്ത്രാലയം അറിയിച്ചു. മരിച്ച രണ്ടു പേരും പ്രവാസികളാണ്. പുതുതായി 74 പേര്‍ സുഖം പ്രാപിച്ച്‌ ആശുപത്രി വിട്ടതോടെ . രോഗം ഭേദമായവരുടെ എണ്ണം 1,329. രണ്ടു പ്രവാസി മലയാളികള്‍ കൂടി ദുബായില്‍ കോവിഡ് ബാധിച്ച്‌ മരിച്ചു. ഒറ്റപ്പാലം സ്വദേശി അഹമ്മദ് കബീര്‍ (47), തുമ്ബമണ്‍ സ്വദേശി കോശി സഖറിയ (51) എന്നിവരാണ് മരിച്ചത്. ശ്വാസതടസമടക്കമുള്ള ആരോഗ്യ പ്രശ്‌നങ്ങളുമായി വ്യാഴാഴ്ചയാണ് അഹമ്മദ് കബീറിനെ ആശുപത്രിയില്‍ പ്രവേശിപ്പിച്ചത്. ഇറാനി ആശുപത്രിയില്‍ ചികില്‍സയിലായിരുന്ന കോശി സഖറിയക്ക് ന്യുമോണിയ ബാധിച്ചതാണ് മരണ കാരണം. ഇതോടെ യുഎഇയില്‍ കോവിഡ് ബാധിച്ചു മരിച്ച മലയാളികളുടെ എണ്ണം ഒന്‍പതായി. അതോടപ്പം തന്നെ ഗള്‍ഫ് മേഖലയില്‍ പതിമൂന്നു മലയാളികളാണ് ഇതുവരെ മരിച്ചത്.

ഖത്തറില്‍ ഒരു പ്രവാസി കൂടി കോവിഡ് ബാധിച്ച്‌ മരിച്ചു. 56കാരനാണ് ഇന്ന് മരണമടഞ്ഞത്. വിട്ടുമാറാത്ത രോഗങ്ങലുണ്ടായിരുന്ന ഇദ്ദേഹത്തിന് കോവിഡ് കൂടി ബാധിച്ചതോടെ ആരോഗ്യാവസ്ഥ ഗുരുതരമായി മരണപ്പെടുകയായിരുന്നുവെന്നും മരണസംഖ്യ 9 ആയി ഉയര്‍ന്നുവെന്നും പൊതുജനാരോഗ്യ മന്ത്രാലയം അറിയിച്ചു. കഴിഞ്ഞ 24 മണിക്കൂറിനിടെ 2,082 പേരില്‍ നടത്തിയ പരിശോധനയില്‍ 567 പേര്‍ക്ക് കോവിഡ് സ്ഥിരീകരിച്ചു. ഇതോടെ രോഗബാധിതരുടെ എണ്ണം 6,015ലെത്തി. 37 പേര്‍ കൂടി സുഖം പ്രാപിച്ചതോടെ, രോഗം ഭേദമായവരുടെ എണ്ണം 555ആയി. 5,451 പേരാണ് ചികിത്സയില്‍ കഴിയുന്നത്. രാജ്യത്ത് ഇതുവരെ 64,620 പേരിലാണ് കോവിഡ് പരിശോധന നടത്തിയതെന്നു അധികൃതര്‍ അറിയിച്ചു.

ഒമാനില്‍ കോവിഡ് സ്ഥിരീകരിക്കുന്ന വിദേശികളുടെ എണ്ണം ഉയരുന്നു. ഇന്ന് പുതുതായി 144പേര്‍ക്ക് കൂടി കോവിഡ്. ഇതില്‍ 86 പേര്‍ വിദേശികളും 58 പേര്‍ ഒമാന്‍ സ്വദേശികളുമാണ്. ഇതോടെ രാജ്യത്ത് രോഗം ബാധിച്ചവരുടെ എണ്ണം 1410ലെത്തിയെന്നും, 238 പേര്‍ സുഖം പ്രാപിച്ചുവെന്നും ഒമാന്‍ ആരോഗ്യ മന്ത്രാലയം വാര്‍ത്ത കുറിപ്പിലൂടെ അറിയിച്ചു. രണ്ടു ഒമാന്‍ സ്വദേശികളും ഒരു മലയാളി ഉള്‍പ്പെടെ അഞ്ചു വിദേശികളുമടക്കം ഇതുവരെ രാജ്യത്ത് കോവിഡ് ബാധിച്ച്‌ ഏഴു പേരാണ് മരണപ്പെട്ടിട്ടുള്ളത്.